براڤو ….كارثة طبيعية .

براڤو ….كارثة طبيعية .

‏غالباً موظف الرقابة اللي عدى عليه مسلسل كارثة طبيعية قرا العنوان بس وماكملش باقي السيناريو!

المسلسل دا هرب بالغلط من مجموعة مسلسلات البلطجية والتكاتك والڤيلل والكومباوندات.

الحلقة التامنة هاتعرفك بالظبط ليه اتسمى المسلسل بالإسم دا.

مشهد بيع محمد وشروق للحاجات اللي مش محتاجينها في بيتهم هو مشهد درامي عبقري بيمثل عملية هبوط الدرجة المتوسطة لتحت خط الفقر في مشهد يخليك تدمع وانت قاعد.

مشهد وصف مدرس الأجيال لحاله، تطنيش المجتمع ليه وتهميشه وكأنه نكرة، واصراره على محاولة الظهور وفقدانه لقيمته اللي بيكتشف انها أصبحت ماضي مش باقي منها غير شوية خيالات في دماغه.

الشاب اللي بيقرر يسافر للمجهول وصعب عليه يسيب بلده، بيقف وسط مكان شغله عشان يودع زمايله وماحدش بيبصله وكأنه تمثيل لإن ماحدش ماسك فيك.. امشي!

شاب بيكتشف ان مثله الأعلى في الكتابة طلع حرامي بياخد مؤلفاته من شباب مخفي في الظل.

إعلام كل همه المشاهدات وتقديم حلقة محتواها ترفيهي بعيد عن قضايا المجتمع الحقيقية وتسليط الضوء عليها.

مسلسل عبقري هياخدك في رحلة من كلام كتير كاتمه جواك بس مش عارف تقوله ولا تعبر عنه.

اياً كانت النهاية، المسلسل دا بيلمس طبقة معينة في المجتمع بقالنا كتير ماحدش اتكلم عنها..

براڤو