” أرجوك لا تقتل الانثى التي تسكن بداخل زوجتك “.

بقلم :: سمر ذكري .

” أرجوك لا تقتل الانثى التي تسكن بداخل زوجتك “.

رساله لكل زوج واعي …” أرجوك لا تقتل الانثى التي تسكن بداخل زوجتك ” كتير من الازواج بيعملوا تصرفات صغيره جدا …في مظهرها هي تصرفات عاديه ومقبوله … لكن مع تراكمها بشكل يومي … بينتج عنها كوارث … اخطرها انهم بيقتلوا روح الانثى داخل زوجاتهم معظم التصرفات دي بتكون نابعه من عدم فهم الازواج لطبيعة الانثى …وخليني ابسطلك الموضوع من خلال الامثله التاليه – لو انت زوج مقتدر ومكفي احتياجات زوجتك الماديه على اكمل وجه … وسايب لها زكيبه فلوس في البيت تصرف منها على كيفها … فده ما يمنعش انك لازم كل فتره تفاجئها بهديه حتى لو بسيطه … واعلم ان الانثى تعشق الهدايا حتى لو كانت اغنى امراه في العالم.

لو زوجتك سيده عامله … وبتتعامل بشكل يومي مع الناس … ده لا يبرر انك تسيبها هي اللي تتعامل مع السباك او الميكانيكي او حتى عمال خدمه التوصيل … ودايما حسسها انها في حمايتك … وتصدر اي تعامل مع الغرباء …. واعلم ان الانثى تحتاج دائما للاحساس بالحمايه حتى لو كانت في منصب وزيرة دفاع – لو زوجتك صاحبه ذوق رفيع … وهي اللي بتختارلك لبسك واغراضك الشخصيه … فده لا يمنع انك تنزل معاها وهي بتشتري اي لبس او غرض شخصي ليها … وتقول رايك وتحسسها انك عاوزها تبقى اجمل ست في الدنيا … واعلم ان الانثى تحتاج للمشاركه حتى في ابسط التفاصيل – لو زوجتك تجاوزت السبعين او وزنها تخطى ال 200 كيلوجرام … ده لا يعطيك الحق ان تتوقف عن الغيره عليها … ارجوك لازم تحسسها انها لسه جميله في عيونك وانك لسه بتغير عليها – لو عندك 20 بنت … او جايب طباخ و طقم مساعدين في بيتك … ما تشربش او تاكل الا من ايد مراتك … الست بتحب تحس ان جوزها بيقدر وبيعشق اي حاجه من ايدها هي اتمنى اني اكون وصلت الفكره … ولازم تعرف حقيقه مهمه … لو قتلت الانثى اللي جوا مراتك … فانت كده بشكل غير مباشر … بتقتل الرجل اللي جواك