اسمع طيب الأول و أقرأ اللى بقوله ….

بقلم : سمر ذكري

اسمع طيب الأول و أقرأ اللى بقوله ….

قبل ما تمسك موبيلك و تكتب و لا تمسك ودن حد و تتكلم  بص فى المرايا كويس …..

هاتكلم !! و مش عجبك الوسايط و المحسوبية؟؟ بص كويس فى المرايا يعنى انت ما عملتش كدة ؟؟ما رفعتش السماعة على معرفة و لا صديق و طلبت طلب مش من حقك ؟؟؟؟

هاتكتبى!! اصبرى و بصى المرايا لسه موجودة  مالك ؟؟ رافضة  الاستغلال؟؟ طب عمرك مع مدرس و لا مدرب و لا مدير حاولت تكسبيه لمصلحتك و لا مصلحة ابنك و اذيتى غيرك ؟؟؟؟

ها تكلم!! تانى خير المرايا لسه موجودة مش راضى عن الغلط و هاتشهر بناس؟؟  يعنى انت عمرك ما غلط و عملت اللى يسئ لك  و غضبت ربك ؟؟؟؟

ها تكتب!! تانى بتنسى المرايا ليه ؟؟؟ ايه مش عجبك الاسلوب و مضايق من اللى بيعمله و عايز تقول  قول بس بالادب و الاحترام هاتقبل حد يغلط فيك و هو بيقول رأيه ؟؟؟؟

هاتكلم!! عاشر  افتكر المرايا الاول زعلان من الفساد؟؟ حقك طبعا  بس براحة و ماتكيلش بمكيلين و لا هو على مزاجك ؟؟؟

قبل ما تكتب و لا تتكلم راجع نفسك و افتكر انك مش ملاك و ان ممكن تكون عملت نفس الغلطات اللى حضرتك معترض عليها من شخص غيرك … فكر و اعرف اننا كلنا بنغلط و ان اللى بيدور على الحق لازم يكون اسلوبه بيمثل الاحترام فى  فرق بين الصوت القوى و الصوت العالى ….  و ما تخليش كرهك هو الحكم و لا مصالحك و مشاكلك مع طرف تتحكم فيك و تبقى عبده مشتاق زى اللى بتتريق عليه

و انت ياللى بتقرأ  بتصدق ليه اى كلام بتسمعه او بتقرأه انت زى اللى قال او كتب … اه اسمع و اقرأ بس دور على صحة المعلومة من اصحاب الشأن بلاش تهيص معاه  اوعى تسمع لاى حد ماتقليش ده عشرة عمر و لا دى اختى لانك ماتعرفش اللى فى النوايا ربك بس اللى عارفها … و خالى بالك مصدر المعلومة مش لازم تكون فرد واحد ممكن مجموعة لها نفس الاتجاه ياللى بتقول و ياللى بتكتب و ياللى بتصدق و تنشر اتقوا الله اللى بقوله ده صوت ضميرك يمكن يصحى لو انت قريت بعقل و نسيت اهوائك الشخصية