من فقر مضجع لأحسن لاعب في العالم… انه ميسي اسطورة كرة القدم العالمية.

كتب :محمود هاشم

من فقر مضجع، لأحسن لاعب في العالم.
ميسي

سنة 1987م اتولد ميسي في الأرچنتين، لأب كان شغال عامل في مصنع وأم عاملة نظافة، فقراء أو يمكن عايشين على قد حالهم، لما وصل 5 سنين بدأ يلعب كورة في نادي محلي اسمه “غراندولي” واللي كان بيدربه وقتها أبوه خورخي لأنه كان بيحب الكورة وشايف في ابنه حاجة مميزة، ولما وصل ميسي 11 سنة اكتشف أن عنده نقص في هرمونات النمو، ودا تسبب في إن نموه بقى ضعيف جدًا على عكس العادي، وبدأ ميسي رحلة علاج صعبة.

نادي ريفر بليت شافوا ميسي بيلعب وقالوا إنهم عاوزين يضموه، لأنه في الوقت دا ميسي أظهر مهارة غير عادية في لعبه للكورة، بس النادي مكنش معاه فلوس كافية علشان يعالج ميسي، اللي كانت 900 دولار شهريًا، ولحسن حظ ميسي، قدر يلفت انتباه كارلوس ريكساش المدير الرياضي لنادي برشلونة، ولما ميسي لعب قدام إدارة نادي برشلونة حصلهم زهول حرفيًا لدرجة إنهم طلبوا من عائلته كلها إنهم ينتقلوا أسبانيا وهيعالجوا ميسي ويتكفلوا بكل المصاريف، وهنا كانت الشرارة الأولى، انتقل ميسي لأوروبا، وبدأ يلعب في فرق الشباب.

سنة 2000م أول عقد وقعه ميسي مع برشلونة وكان عنده 12 سنة تقريبًا، والعقد دا كان اتفاقه المبدئي اتدون على منديل.

وهو عنده 16 سنة لعب أول مباراة رسمية، وكسر الدنيا بمهاراته حرفيًا، بعدها بسنة لعب لأول مرة في الدوري مع برشلونة ضمن فرقتها الأساسية، وكان تالت أصغر لاعب يلعب مع صفوف الفريق الأول وأصغر لاعب يلعب مع برشلونة في الدوري الأسباني.

أول هدف سجله ميسي كان ضد ألباسيتي، رونالدينهو مرر الكورة ليه وسقطها من فوق حارس المرمى، وكان أصغر لاعب في الوقت دا يسجل في الدوري الأسباني وهو عنده 17 سنة، وفضل حامل اللقب لحد سنة 2007م لحد ما خده بويان كركيتش.

سنة 2005م جددت برشلونة عقد ميسي لحد سنة 2014م وبدأ ياخد أجرته زي أي لاعب موجود، وخد الجنسية الأسبانية، وبدأت حياة عائلته المادية تتغير تمامًا، وبدأ يتسلط الضوء عليه كلاعب قوي وهداف كبير في برشلونة، خصوصًا أول مباراة في الدوري الأسباني لما الجمهور سقفوا ليه وقت نزوله ودا بسبب ليونته مع رونالدينهو وفوز برشلونة.

سجل ميسي 6 أهداف في 17 مباراة في الدوري الأسباني، وفي دوري أبطال أوروبا سجل هدف واحد، ولكنه حصل له تمزق في عضلة الفخد ووقف لعب فترة سنة 2006م.

تعافى ميسي بسرعة وقدر يفرض نفسه كلاعب أساسي في برشلونة، سجل 14 هدف في 26 مباراة، وبعدين اتصاب تاني بكسر في مشط رجله قعده 3 شهور.

ورجع لعب وفي أول مباراة ليه جاب هاتريك وكانت برشلونة خسرانة 3 وقدر يتعادل، ومن هنا بقى اسمه يتردد على ألسنة الجماهير وبدأ يتعرف بين اللاعبين، خصوصًا إنه أصغر لاعب في التاريخ يحقق هاتريك في الكلاسيكو، وفي آخر 13 مباراة جاب 11 هدف!

بدأوا يشبهوه بمارادونا لدرجة إن الصحف بدأت تطلق عليه ميسيدونا، ودا لأنه كان بيقلده في أفعال كتير، حتى في الهدف اللي جابه مارادونا بإيده ميسي جاب زيه ضد إسبانيول.
أهداف ورا أهداف وميسي بيتعرف أكتر وبيكبر وناس أكتر بتشجعوا وبقى لاعب تقيل في برشلونة وبقى سبب في بروزها في الدوري الأسباني ودوري أبطال أوروبا.

اتعمل استطلاع رأي على النت وخد ميسي 77% من الأصوات كأفضل لاعب في العالم، واترشح لجائزة اتحاد اللاعبين المحترفين في فئة الهجوم.

مشي رونالدينهو من الفريق وخد ميسي رقم 10، وفضل يسجل في أهداف ويصنع في أهداف وسرعته في تزايد غريب ورهيب وترقيصه للاعبين غريب جدًا، والصحف والجرايد بتكتب إنه لازم ياخد الكورة الذهبية وشعبيته بتكبر حول العالم كله!
لحد ما حصل على المركز التاني لأفضل لاعب في العالم سنة 2008م.

2009م سجل هاتريك تاني ضد أتليتكو مدريد، وبعدها هدفين ضد بايرن وفضل يسجل في أهداف ويحقق أرقام قياسية ويرفع في برشلونة لفوق.
وقبل انتهاء الموسم سجل هدفين ضد ريال مدريد وكانت النتيجة 6/2 وكانت أصعب هزيمة لريال مدريد من سنة 1930م.

خد الهداف الأول في دوري أبطال أوروبا، وأصغرهم سنًا برصيد 9 أهداف، وخد جائزة أفضل مهاجم وأفضل لاعب، وكانت النتيجة إن برشلونة خدت كأس ملك أسبانيا، والدوري الأسباني، ودوري أبطال أوروبا كل دا في سنة واحدة، وكانت المرة الأولى اللي يعملها النادي.

بدأ مدربين كتير يأكدوا إن ميسي أفضل لاعب في العالم، ومشجعين حول العالم، وهنا وقع عقد مع برشلونة بأجر يعد الأعلى في الدوري الأسباني بيتناسب مع أجر إبراهيموفيتش.

وبيفضل ميسي من أفضل ما لعب في برشلونة وحقق لها جوائز وكؤوس على مدار سنين طويلة لحد سنة 2020م وبينتقل لباريس سان جيرمان.

حصد ميسي عدد مهول من الجوايز على مدار مسيرته وغريب جدًا.

جائزة الكورة الذهبية خدها 7 مرات.

جائزة الأفضل في الفيفا 2009م.

الحذاء الذهبي 6 مرات.

أفضل لاعب في أوروبا مرتين.

أفضل لاعب في أوروبا على صعيد الأندية مرة.

هداف الليجا 7 مرات.

هداف أبطال دوري أوروبا 6 مرات.

أفضل لاعب في الليجا 9 مرات.

أفضل مهاجم في أوروبا مرتين.

جائزة هدف الموسم من ويفا 3 مرات.

أفضل لاعب في كوبا أمريكا مرتين.

هداف كوبا أمريكا مرة واحدة.

الكرة الذهبية لكأس العالم مرتين واحدة في 2014م وواحدة النهاردا في 2022م وصورتها فوق

ومع ظروف سيئة في الصغر، وفقر مضجع، يصعد ميسي ليصنع أسطورة لا يمكن أن تُكرر في تاريخ كورة القدم.