عيلة واحدة حكمت الفن 80 سنة.

عيلة واحدة بس عملت كل أفلامك من أول الأبيض والأسود لحد نتفليكس.. بس اللي محدش يعرفه إن جوازاتهم كانت أفلام لوحدها.

الحدوتة بدأت في طنطا مع ولد اسمه محمد فوزي، صوته دخل كل بيت وبقى أشهر ملحن في مصر، واخواته البنات طلعوا زيه.. هدى سلطان بقت نجمة كبيرة بتمثل وتغني وهند علام اللي كانت بتحب الفن من بعيد.

وفي مرة هدي سلطان كانت في ستوديو نحاس سنة 1950، رايحة تقابل أبطال فيلم ست الحسن، وفريد شوقي واقف، المفروض في المشهد يقول يا كوثر راح ناطق يا هدى بالغلط قدام الكاميرا فالمخرج وقف التصوير.. الناس ضحكت وهو اتحرج بس من هنا بدأت القصة. حبها واتجوزوا في ليلة حفلة أم كلثوم الشهرية في فبراير 1951، وعملوا مع بعض أكتر من 20 فيلم زي جعلوني مجرما ورصيف نمرة 5.

الجوازة دي قعدت 15 سنة ومرة وصلت 18 سنة في كلام تاني، وباظت بسبب الغيرة.. فريد كان بيروح معاها الاستوديو عشان بيغير من رشدي أباظة في فيلم امرأة في الطريق.

بعد الطلاق فريد كان بيعرض مسرحية الدلوعة على مسرح الريحاني سنة 1968، وجات بنت حلوة ورا الكواليس تقوله أنا معجبة بيك وحافظة كل أفلامك.. دي كانت سهير الترك، عاملها باحترام كمعجبة وبعدها بسنتين اتجوزها سنة 1970 وعاشوا 28 سنة لحد ما مات سنة 1998، وخلفت له رانيا وعبير.

رانيا فريد شوقي اتجوزت أول مرة من عاطف عوض ابن الفنان محمد عوض مصمم الرقصات وخلفت منه ملك وفريدة، وبعدها اتجوزت مصطفى فهمي سنة 2007 وانفصلوا 2012، وبعدها تامر الصراف في أغسطس 2015.

أما فرع هدي سلطان فخلفت المنتجة ناهد فريد شوقي ومها فريد شوقي فده كان أعجب فرع.. ناهد اتجوزت المخرج مدحت السباعي سنة 1986، وخلفوا الفنانة ناهد السباعي والمخرج محمد السباعي.

محمد السباعي اتجوز الفنانة آية سماحة يوم 15 مايو 2020 في قعدة عائلية صغيرة .. آية نفسها قالت إنه كان رافض الجواز تماما في الأول وكان خايف من المسؤولية، وهي قالت له احنا هنشيلها مع بعض دي مش حرب، وندمت بعدها إنها معملتش فرح عشان الكورونا.

مها اتجوزت لواء حربي اسمه جمال سعيد وخلفت منه ولدين الممثلين المعروفين احمد ومحمد

شايف اللفة؟ من واحد غلط في اسم حبيبته قدام الكاميرا سنة 51، لواحد بيتجوز في زمن الكمامة سنة 20.. نفس العيلة.

عيلة واحدة حكمت الفن 80 سنة.. تفتكر السر كان في الموهبة ولا في الجوازات اللي كلها من الوسط