كل الناس نيوز ..الفنانة نجمة إبراهيم.

كل الناس نيوز ..الفنانة نجمة إبراهيم.

ست سنين عاشتها الفنانة نجمة إبراهيم وهي فاقدة البصر، ورغم فقدها للبصر، كانت بتروح المسرح وبتأدي أدوارها معتمدة على جوزها عباس يونس اللي كان بيذاكرلها الأدوار ويحفظهالها.. وكانت بتعتمد على احساسها في حركتها على المسرح..

نجمة عرفت من المسرح من وقت طفولتها لما كانت بتروح مع اختها سرينيا.. (بالمناسبة نجمة إبراهيم مش اخت راقية إبراهيم.. خدلك مناسبة على المناسبة مفيش أي علاقة بين راقية إبراهيم وبين سميرة موسى أصلا.. ولا شاركت في اغتي**الها ولا حفيدتها طلعت مذكراتها.. ولا في حفيدة ولا في مذكرات.. واللي يقدر يجيبلي المذكرات دي يطلب اللي هو عايزه)…

وهتتفاجئ ان نجمة إبراهيم بدأت حياتها كمطربة.. لان صوتها كان جميل جدا.. وظهرت مع فرقة الريحاني لما كانت بتعرض في مسرحية الاجبسيانة. وبعدها راحت فرقة رمسيس بتاعت يوسف وهبي… ولفت لفة حلوة.

لحد ما عملت فرقة باسمها، وقدمت عروض مسرحية وخسرت اللي وراها واللي قدامها.. حتى انها عملت مسرحية قدمت فيه اشهر أدوارها في مسرحية “السف**احة ريا”، لكن برضه الفرقة فشلت.. وقفلت بعد ما خسرت 10 الاف جنيه..

في الأول ظهر في عينيها مية بيضا، فراحت تكشف عرضوها قومسيون طبي، فقالوا عادي مرض بسيط وتتعالج في القاهرة، وعملها الدكتور عبد المحس سليمان عملية في عين واحدة، لكن العملية فشلت… فخاف على العين التانية فسفروها تتعالج في اسبانيا.. تحت اشرف الدكتور باركير.. ودا اشهر طبيب عيون في العالم في الوقت دا. وطلع الدكتور عبد القاجر حاتم قرار بعلاجها على نفقة لدولة..

بتقول لما فتحت لقيت شعر عباس جوزي ابيض، فقالتله ايه اللي حصلم يا عباس.. قالها: “متقلقيش .. انا صبغت ابيض”، وقعدوا يضحكوا..

نجمة أصلا اسمها بوليني أوديون.. بنت يهودية مصرية.. لكنها اسلمت وسمت نفسها نجمة ابراهيم… وبقت تتبرع بايرادات حفلاتها للجيش المصري.. بل وعملت بينها محفظة لتحفيظ القرآن..

لكن هي ملحقتش تفرح.. بفكرة استرداد بصرها.. لانها اصيبت بالشلل، وبقى صعب قوي تمثل وهي كدا.. فاعتزلت.. بعد ما قدمت اخر مسرحية ليها غادة الكاميليا سنة 68.. وفضلت بعدها 8 سنين في البيت.. لحد ما توفاها الله 4 يونيو 1976…

وعلى عكس دور ريا اللي تقريبا اشهر ادوارها.. نجمة كانت ست خوافة جدا.. ومن كتر خوفها مكانتش بتقدر تتفرج على افلامها.. بل لما سألوها انتي بتمثلي ازاي كدا.. قالت انا بمثل الحاجات اللي بخاف منها..

الله يرحمها ….