يوميات سحلول و ام سحلول

 يوميات سحلول و ام سحلول

بقلم : ريهام شرارة

سحلول و امه مش ناس غريبة عنكم اما هتسمعوا يومياتهم هتلاقوا نفسكم او حتة منكم في كل حكاية… و دا طبعا عشان الاجيال الجديدة و النت و الموبايلات و الانفتاح…
سحلول هو رمز صمود الطفل المصري في وجه المعتدي الغاصب(لا ايه اللي بقوله دا كده افورت و هربت مني 😂)…. قصدي سحلول دا حاجة كده الدنيا ميبقاش لها طعم من غيره هو و لماضته ربنا يخليه و يخلي كل السحاليل جميعا….
خلوني ابتدي معاكم بقي..
بصي يا ستي اللي يقولك الأمومة مش سهلة بس مستاهلة… متفكريش و اديله في وشه علي طول، مبهزرش انا… مش مصدقين ؟!
تعالوا أوريكم نبذة هايلة كميلة مقطقطة عن سهولة الاعوعة قصدي الأمومة في المذاكرة….
ام سحلول: حبيب ماما اللي هيذاكر و يبقي أشطر ولد السنة دي في المدرسة…
سحلول : مدارس ايه و بتاع ايه و اشطر ولد ازاي دا مش هدفي…
ام سحلول : كل دا عشان هقولك نام بدري و اصحى بدري و فين الهوم ورك و الشنطة مش تقيلة و خليك مؤدب في الفصل و اسمع الكلام و و و و….
سحلول(بيقاطعني) : لااااا طبعا… انت عارفة ان كده كده مش فارق معايا المواضيع دي… و لا التعليم ذات نفسه و لا عايز اطلع دكتور و لا مهندس و لا اي بطيخ من دا….
انا هموووووت في سري بطيخ..!!! العلم بقي بطيخ😨
ام سحلول : اومال ايه اللي فارق معاك يا فيلسوف الغبرة.. يا آخرة صبري؟
سحلول : طول ما دا اسلوبك في النقاش معايا يا ماما متستنيش مني إني أبقي شخص كويس….
ام سحلول(بكتم غيظي جوايا و بجز علي سنااااني) : حقك عليا يا قلب ماما يا فشة ماما.. حلو كده؟
سحلول(بمنتهي البرود اللي ممكن يبقي عند طفل و زيادة حبتين) :خلاص يا ستي هقولك و أمري لله….
عمالة ابص حواليا يمين و شمال علي أقرب شبشب أحدفه به في خلقته.. و بعدين بعد عني الشيطان المتوحش
ضميري صحي و رسمت ابتسامة برود شبه ابني و قولت اسمع الحكم الافلاطونية السقراطية مضروبين مع بعض في الخلاط ما هو يوم مش فايت باين..
سحلول(يبدأ وصلة شللي بقوة) :انا كل اللي مزعلني في الموضوع إني ههمل قناتي و متابعيني هيزعلوا و مستقبلي اليوتيوبي هيضيع… شوفتي المأساة…
ام سحلول(و خلاص بقيت متأكدة اني اخرتي علي كرسي بعجل):ولااااااا… قوم فز من قدامي قناة ايه و هباب ايه اللي زعلان عليها دي… ركز في مذاكرتك يا حبيبي…
سحلول(بمنتهي العزة و الشموخ) :يعني اللي ركزوا عملوا ايه؟ و بعدين مش انت بتقولي معيار الانسان النجاح و الانسانية؟ هي المذاكرة دي فيها اي انسانية اللي بناخده دا يتعارض مع الانسانية و المستقبل….
ام سحلول: ” يتعارض اصلا” في خامسة ابتدائي؟! انت عايز ايه دلوقتي؟
سحلول(قلب قطة بعد ما خاف من الوش اللي اديتهوله) :عايزة تفرفشي و تنعنشي يا احلي الامهات و انا هفهمك وجهة نطري….
ام سحلول(هطق فعلا.. ابن امبارح بقي عنده وجهة نظر) :فهمني يا نبيه باشا…
سحلول: بذمتك يا ماما و انا عارف انك ام واعية و منطقية و فاهمة الواقع من حواليكي.. انت عايزاني اسيب قناتي عشان اقعد اذاكر قصة شوية فشلة انتحروا عشان خسروا معركة ما هم اللي مخططوش كويس و قعدوا يحبوا في بعض انا مالي و مال انطونيوس و كليوباترا دول في النهاية محتلين.. يعني بيدرسولنا قصص حياة فاشلين عشان نفشل زيهم مثلا؟
ام سحلول: يا ابني يا حبيبي دا تاااااااريخ عيب كده… و بعدين في ناس حلوين زي حتشبسوت و نفرتاري..
سحلول :ركزي كده… احنا بنتخانق الراجل اسمه بطليموس و لا بطلميوس.. دا جنان بقي و لا لا؟ صدقتي ان قراري اني ابقي فاشل في الفشل يعني نجاح…
ام سحلول(لاااا الواد دا هيشلني يعني هيشلني مفيهاش كلام) :يا حبيبي يا
يا عنيا يا اجمل نعمة ربنا ادهالي حرام علي دا انت شاللني و شالل ابوك و شالل مدرسينك و مدربينك و نص اللي نعرفهم… (صعبت عليا نفسي و قولتلها احنا كان مالنا و مال الجواز و الخلفة ما كنا متستتين في بيت بابا و لا يقدر يقولنا يتعارض و لا عوامل النجاح و لا الانسانية)…. هههههه
الاستاذ طبعا اخد باله اني سرحت و لمح كل مكنوناتي اللي يا ريتني ما كنيتها و راح رازعني الجملة دي: طبعا متوقع.. تلاقيكي شغلتي جواكي اسطوانة الامهات بتاعت يا ريتني ما اتجوزت و لا خلفت بلا بلا بلا… بس انا هسكت عشان قدر العباقرة ان محدش يفهمهم الا العباقرة اللي زيهم غالبا انا مش ارضي انا فضائي…
و اكتفيت ببصة له و بعدين للسقف مع الجملة الامهاتي اياها… “ياااا رب عوض الصابرين”
رأيكم ايه بقي؟
تفتكروا انتحر دلوقتي و لا علي ايه ما هو موتة ربنا جاية جاية مع العيل العجيب دا…..
بجد بقي…. رفقا بولادكم لسه فيهم و فينا حاجات حلوة تستاهل نعافر عشانها❤
و لسه في حكايات كتير لسحلول و امه استنونا