بلاش تخلوا الاولاد وسيلة عقاب لما تنفصلوا.

بلاش تخلوا الاولاد وسيلة عقاب لما تنفصلوا.

دا واحد من اغرب الاسباب اللي شفتها في حياتي عن حد دخل مجال التمثيل.. هي قصة نانسي صلاح اللي دخلت عالم الفن عشان تلاقي امها.. بص هي قصة غريبة شوية .. فخلينا احكيلك..

نانسي صلاح ممثلة وبدأت بالاعلانات، وبعد كدا اتشهرت في ستاراداي نايت لايف (SNL)، فمنى الشاذلي استضافتها وقالتلها ازاي بدأتي موضوع الاعلانات والتمثيل.. قالتلها انا دخلت المجال عشان الاقى مامتي..

هي ابوهلا وامها انفصلوا.. فهي كانت لسه مولودة.. فعاشت مع امها.. لحد سن تلات سنين، وابوها اخدها من امها… وخباها عن امها.. وانقطعت علاقتها بامها تماما.. ابوها قالها في الاول: “احنا هنقعد مع بعض شوية.. وبعدين ارجعك لماما”.. لكن الشوية دي فضلت 27 سنة..

فكل ما تقول لابوها عايزة ماما يقولها الاسبوع الجاي.. الشهر الجاي.. هقبض ونروحلها.. لحد ما في مرة وهي 6 سنين.. قالت لابوها: “على فكرة.. انا هكبر وهطلع في التلفزيون.. وماما هتعرفني وهتعرف مكاني وتجيلي”… فكرة عيالي بس هي قررت تنفذها..

طبعا 3 سنين صعب يكون ذاكرة بصرية.. وهي معندهاش أي صورة لامها.. فنسيت شكلها.. لما مثلت في ساترداي نايت لايف.. كانت امها تشوفها وتقول والله البنت دي شبه بنتي.. لحد ما قرت التتر وعرفت أنها مش شبه بنتها.. لا هي شبهها واسمها ع اسمها كمان.. طيب ما يمكن تكون هي..

في الفترة دي نانسي جالها فيروس خطير في المعدة وتعبت جدا ووزنها قل لـ 48 كيلو، وكانت عايشة مع عمتها.. فعمتها فكرت في حاجة تعملها تخفف عنها.. فراحت كلمت امها وقالتلها تعالى شوفي نانسي.. وسافرت جابتها من دولة عربية كانت عايشة فيها واتجوزت فيها وخلفت بنت تانية..

وفعلا تم اللقاء بعد 27 سنة.. وان البنت اللي اسمها نانسي مش بس شبه بنتها ولا اسمها على اسمها.. لا هي بنتها نفسها..

وفي يوم، كانت نانسي بتتلوى من المرض، لما دخلت عليها ست كبيرة، وحضنتها، وقالتلها انا امك.. وقالت انا مش زعلانة من بابا وماما.. انا بحبهم جدا.. والقصة عملتني اكون قوية..

المحزن أن بعد اللقاء اللي جه بعد غياب 27 سنة.. ماتت ام نانسي.. ماتت بعد ما شافت بنتها..

مرة تانية.. بلاش تخلوا الاولاد وسيلة عقاب لما تنفصلوا.. هما ملهمش ذنب في مشاكلكم.. يشوف عياله وتشوف عيالها.. وخلافاتكم دي هما ملهمش أي ذنب فيها..